Боюмда бар экенин апама кантип айтам? Кыздарга кеңеш
Эмне кылсам? Калп айтсамбы? Же... Жок, аборт тууралуу ойлонгум да келбейт. Эмне кылыш керек?
Үй-бүлө балдар үчүн курулат! Ымыркай үй - бүлөдө төрөлүп, үй – бүлөдө жашашы керек. Бирок, жашоодо ар кандай болот.
Эгер жашың жете элек окуучу болсоң, ата-энеңе дароо айт. Сага жардам керек, өз алдынча эч нерсе кыла албайсың. Алар боюңда кылган жигит менен сүйлөшөт. Жашы жетпегендерди азгыруу – кылмыш!
Окуучу эмес болсоң, маселе "жигит сага үйлөнөм деп жатабы же жокпу?" суроосуна карап чечилет.
Кандай болгон күндө да, ата-энеңден көз каранды болсоң, өзүңдүн үйүң, жумушуң жок болсо, мүмкүн болушунча тез арада сүйлөшүү керек.
Баланы сактап калуу же бойдон алдырууну өзүң чечесиң.
Энеге айтуу кыйын, бирок айла жок! Минтсең болот: “Апа, сиз менин эң жакын жана сүйүктүү адамымсыз. Сиз гана мени түшүнүп жана жардам бере аласыз. Мен бир баланы сүйүп калгам, ал да мени жакшы көрөөрүн айтчу жана убада кылган (же кылган эмес)... Мен күнөөлүмүн, жакында боюмда бар экенин билдим. Мага жардам бергилечи!"
Сен төрөгөндө бардык түйшүктү апаң тартат.
Кыздар, "тойго чейин жыныстык катнашка барба", - деп апаңар айтса керек. Эгер андай боло турган болсо, бойго бүтүрбөөчү каражаттарды колдонгула! Алар кош бойлуулуктан гана эмес, уяттан, аборттон, тукумсуз болуп калуудан сактайт, тагдырыңарды талкалабайт: билим алып, жумуш таап жана турмушка чыгуу мүмкүнчүлүгүн берет.
Өзүңө жана келечегиңе кам көр!