11 жыл мурунку мурасты кантип өткөрүп алсак болот? Юристтен кеңеш
Атам 11 жыл мурда каза болгон. Атамдын атындагы үйдү байкеме каттатуу үчүн өзү келиши керекпи? Ал Россияда жашап, иштейт. Убагында каттатып албаган үчүн канча айып төлөнөт?
Нурислам Раимжанов
"Справедливость" укук коргоо уюмунун юристи
Байкеңиз өзүнө мурасты каттатуу үчүн Россиядан ишеним кат жазып жибериши керек. Мурасты кабыл алуу, мураска байланыштуу үй мүлктү каттатуу боюнча иштерди алып баруу боюнча РФнын нотариалдык кеңселеринен, ишти алып бара турган адамдын атына ишеним кат жазып жөнөтсүн.
Ишеним кат кимдин атына жазылса, ошол байкеңиздин ордуна сот иштерине катышып, ишти алып барат.
Мурасты өз учурунда кабыл албаганы үчүн айып төлөбөйт, болгону мурасты кабыл алуу сот аркылуу жүрүп калат. Анткени алты айдын ичинде мурасты кабылуу алуу боюнча ишти ачтыруу керек болчу. Мөөнөтү өтүп кеткенден кийин соттон кошумча убакыт сурайт. Ал эми сотко кайрылуу үчүн 1000 сомдун тегерегинде мамилекеттик алым төлөйт.
Ийгилик!