Кантип алиментти мыйзамдуу жол менен төлөсө болот?
Саламатсызбы! Алиментти кантип мыйзамдуу жол менен төлөсө болот? Кийин бир көйгөй пайда болуп калбаш үчүн билип алайын дедим эле.
Нурислам Раимжанов
"Справедливость" укук коргоо уюмунун юристи
Урматтуу окурман! Кыргыз Республикасынын Үй-бүлө Кодексинин 85-беренесинде жашы жетпеген балдарды багуу боюнча ата-эненин милдеттери көрсөтүлгөн. Анда: "Жашы жетпеген балдарды багуунун тартиби менен түрү ата-эне тарабынан өз алдынча аныкталат. Ата-эне өздөрүнүн жашы жетпеген балдарын багуу тууралуу ушул кодекстин 17-главасына ылайык макулдашуу (алимент төлөө тууралуу макулдашуу) түзүүгө укуктуу" деп жазылган. Демек, силер биринчи кезекте алимент төлөп туруу боюнча жазуу түрүндө макулдашууга келүүңөр керек болот. Андан кийин алименттин суммасын банк аркылуу анын эсебине которуп же алименттин суммасын алгандыгы боюнча тил кат жаздырып алып төлөп турсаңыз болот.