Кызымдын тиши кеч чыгып жатат. Ден соолугуна коркунучтуу эмеспи?
Саламатсызбы. Кызымдын тиши кеч чыгып жатат. Азыр 1 жаш 1 ай болуп калды. Педиатрга алып барып, анализ тапшырганбыз. Жыйынтыгы жакшы чыкты. Доктур витаминдерди жазып берген. Тишинин кеч чыкканы ден соолугуна терс таасирин тийгизбейби?
Эдиль Садыков
педиатр
Саламатчылык!
Кызыңыздын тишинин кеч чыгышы сиздин кош бойлуулугуңузга байланыштуу болушу мүмкүн. Мисалы, боюңузда бар кезде богок бези (зоб) болгон, бирок сиз доктур жазган йодомаринди жакшы ичкен эмессиз. Же болбосо тукум кууйт. Апаңыздан, бир туугандарыңыздан сиздин жана баланын атасынын тиши качан чыкты эле, деп сурап көрүңүз.
Балдарды ден соолугу жана өнүгүү темптери ар кандай болот. Кээ бир балдардын конституциясына жараша тиши кеч чыгышы мүмкүн. Кийинчерээк тиштери биринин аркасынан бири чыга берет. Бул оору эмес, ошондуктан ден соолугуна эч кандай залал тийгизбейт.