Педиатр баламдын тили кыска экен кестир деди, бул коркунучтуу эмеспи?
Балам 5 айлык. Педиатр тилин көрүп, кыска экен, кийин кекечтенип сүйлөп калат, кестир, деп айтты. Бул коркунучтуу эмеспи?
Нуржамал Жаанбаева
Педиатр
Саламатчылык. Мындай паталогия балдарды көп эле кездешет, өзгөчө эркек балдарда.
Тилинин кыска болушу, келечекте анын речининин калыптануусуна жана кекечтенүүсүнө эч кандай таасирин тийгизбейт. Анткени кекечтенүү көпчүлүк учурда психологиялык жабыркоодон улам келип чыгат. Мисалы катуу коркуп же чоочуп калуудан, басынтуудан ж.б. Ал эми тилдин кыскалыгы айрым тамгаларды же тыбыштарды туура айтуусуна тоскоолдук жаратышы мүмкүн.
Тилдин кыскалыгы, негизинен наристенин эмчек эмүүсүнө ыңгайсыз. Анткени тили кыска болуп, таңдайына жетпейт. Жакшы эме албай кыйналат. Башка балдарга салыштырмалуу көбүрөөк энергия коротуп, тердеп, бат эле чарчап калат. Курсагы тойбойт.
Камсанабаңыз, бул процедура коркунучтуу эмес. Хирурга кайрылсаңыз бат эле кесип берет.
Балаңыз ден соолукта болсун!