Курбум кайын агасына каттатып койгон үйүн алалабы?
Менин жакын курбум бар, жолдошу мамлекеттик кызматта иштейт. Мамлекеттен аларга үй берилмек болот. Ал үйдү алыш үчүн жолдошу экөөнүн үйү, жери, машинасы жок деген маалымкат талап кылынат. Ошол учурда курбум күйөөсү экөө жаңы эле сатып алган үйүн кайын агасына каттатып коюшат. Азыр мамлекет тарабынан берилген үйдө жашашат. Ал үйү менчикке өтө элек. Күйөөсү экөө көп урушат. Кайын агасынын наамындагы үйүнүн документи курбумдун колунда. Жолдошу менен ажыраша турган болсо, сатып алган үйү алардыкы экенин тастыктай алабы?
Нурислам Раимжанов
"Справедливость" укук коргоо уюмунун юристи
Курбуңуз үйдү жолдошу экөө алып жаткандан кийин, ал жубайлардын ортосундагы чогуу тапкан жалпы мүлк болуп эсептелиниши керек эле. Бирок, алар кайын агасынын атына каттатып койгон экен. Эми үй анын жеке мүлкү, курбуңуз жолдошу менен ажырашкан күндө деле, ал мүлктү жубайлардын ортосунда бөлүштүрүү маселеси каралбайт. Үйдү кайра өз атына алып, кайын агасыныкы эмес экенин далилдөө өтө кыйын жана узак процесс. Баарыңарга айтаарым, ушундай кырдаалга кабылып калбаш үчүн, өз мүлкүңөрдү өз атыңарга каттатып жүргүлө!