Жездем апамдан жер доолап жатат. Эмне кылсак болот?
Мындан 10 жыл мурун апама бир эже келип, "жер алып берем, туугандарыңа айт 3 миң доллардан беришсин" дегенинен, апам сүйүнүп, эжемен акча алып берген. Ошол бойдон жерден дайын жок. Бул арада апам кыйналып кетти. Эжем күйөөсү менен кайын энесинен сөз уга берип куурап бүттү. Кийин жездем, "алган акчаны кайтарып бергиле",- деп, апамдардан 3 миң доллар алды. Ага кошумча, "жерди да алып бересиңер, ушунча жылдан бери пайызы өстү",- деди. Акчаны бердик, болду кутулдук десек да укпай жатат. Эмне кылсак болот?
Нурислам Раимжанов
"Справедливость" укук коргоо уюмунун юристи
Саламатсызбы! Жездеңиздин жер доолаганга эч кандай укугу жок. Апаңыз алган акчасын кайтарып берсе болду.
Акчаны алып жатканда апаңыз жездеңиз менен эч кандай келишим түзгөн эмес, туурабы? Акчаны үстөк пайызы менен берчүдөй жездеңиз банк же ломбард эмес, ортолорунда “10 жылдан кийин кайтарып бербесең мындай кылабыз” деген жазуу түрүндөгү келишим да жок.
Андыктан, эч кандай жер алып бербей турганыңарды түшүндүргүлө. Апаңыз көп кабатыр болбой эле койсун, жездеңиз акчасын алгандан кийин, жер доолаганга укуктуу эмес.