Алиментке арыз жазсам, жолдошум үй алып береби?
Саламатсызбы! Менин эки балам бар, үчүнчүсү жарыкка келейин деп калды. Ата-энем кичинемде ажырашып кеткен, алар менен катышпайм. Чоң атамдын колунда чоңойгом. Алар өткөн соң, ал жерге да батпай калдым. Тилекке каршы жолдошум менен жашообуз болбой жатат. Мен алимент өндүрүүгө арыз жазсам, ал мага үй алып бергенге укуктуубу же жокпу? Мен 3 балам менен кайда барам?
Нурислам Раимжанов
"Справедливость" укук коргоо уюмунун юристи
Саламатсызбы! Үч же андан көп балага жолдошуңуз иштеп тапканынын жана (же) дагы башка кирешесинин жарымы өлчөмүндөгү алимент төлөйт.
Мыйзамда, "Эмгек акынын жана (же) колдо кирешенин жоктугу балдарды багуу боюнча милдеттерден жолдошуңузду бошотпойт жана ал белгиленген өлчөмдө алимент төлөө үчүн каражатты өз алдынча издеп табууга, ошол жердеги орточо эмгек акынын өлчөмүнө жараша же алиментти кыймылдуу, болбосо кыймылсыз мүлк же балага же балдарга барабар үлүштөрдө менчигине берүү жолу менен анын бөлүгү менен жаап берүүгө милдеттүү" деп көрсөтүлгөн.
Бирок, үй куруп берүүгө милдеттүү эмес. Болгону жолдошуңуз өзү каалап үй куруп, аны алименттин эсебинен балдарга өткөрүп берүүсү мүмкүн.