Үйүбүздү кайын энемден кантип алсам болот? Юрист жооп берет
Саламатсызбы! Жолдошум экөөбүз чогуу иштеп там салганбыз. Үй кайын энемдин атына катталган. 2 жыл мурун күйөөм каза болуп калды. Эми кайын энем үйүбүздү бербей жатат. Баламын атына кантип өткөрсөм болот?
Нурислам Раимжанов
Юрист
Саламатсызбы! Үйдү качан жана кимден сатып алгансыңар? Кайын энеңиздин атына эмне болуп катталып калган? Сатып алып жатканда акчаны ким берген? Буларды тактоо зарыл. Бүгүнкү күндө мүлк кайын энеңиздин мүлкү болуп эсептелет. Ал кааласа өткөрүп берет, каалабаса жок. Сизге азыр так маалымат берүү кыйын.
Чынында эле жерди жолдошуңуз менен сатып алып, үй курсаңар, мүлк силерге катталышы керек эле. Кайын энеңиз бергиси келбесе сот аркылуу сатып алуу келишимин бузуу керек. Бир жолу бар: “Үйдү биз сатып алганбыз, кайын энеме каттатып койгонбуз, бүгүнкү күндө кайын энем бизге өткөрүп бербей жатат, ошондуктан сатып алуу келишимин жараксыз деп табуу керек” деп жерди баштапкы ээсине кайтарып, ал кайра силерге өткөрүп бериши зарыл. Бир сөз менен айтканда тактай турчу жагдайлар көп, документтерди көрмөйүн, бир нерсе деп айта албайм.