Кызымды ата-энеме таштасам, кайын журтум келип алып койбойбу? Юрист жооп берет
Саламатсызбы! Жолдошум менен ажырашып кеткем. Ортобузда бир бала бар. Сырт жакка иштегени кетип жатып, кызымды ата-энеме таштасам, кайын журтум келип алып кетип калышпайбы?
Нурислам Раимжанов
Юрист
Урматтуу окурман, Кыргыз Республикасынын үй-бүлө кодексинин 71-беренесинде «Баладан бөлөк жашаган ата-эненин бири аны менен катташууга, тарбиялоого жана багууга катышууга, баланын билим алуу маселесин чечүүгө укугу бар» деп көрсөтүлгөн.
Ошондой эле, «Бала менен чогуу турган ата-эненин бири баланын башка ата-энесинин бири менен катташуусуна тоскоолдук кылбашы керек, эгерде мындай катташуу тулку-боюна жана психикалык жагынан дени сак, ыймандуу өсүп-жетилишине залал келтирбесе» деп жазылган.
Тактап айтканда, эгер атасы баланы алып кетем десе, анда бул нерсеге толук укуктуу. Сизге кеңешим, баланы көрүп туруу жана жогоруда көрсөтүлгөн укуктарын жүзөгө ашыруу тартиби тууралуу жолдошуңуз менен жазуу жүзүндө макулдашуу түзүп алыңыз.