Сүйлөшкөн кызымдын боюнда бар, эми эмне кылам?
Сүйлөшкөн кызымдын боюнда бар, эми эмне кылам?
Гүлмира Молдокулова
психолог
Мындай абалда биринчи айтаарым үйлөнгүлө, өзүңөр кылган ишке жооп бергиле! Бирок ар кандай кырдаалдар болушу ыктымал. Силер экөөңөр тең толук жетилген болсоңор чогу олтуруп сүйлөшкөнүңөр оң. Бири-бириңерди жакшы көрөсүңөрбү, сүйүү барбы? Боюнда болгонго чейин мамилеңер кандай эле, андан кийин өзгөргөн жокпу? Ата-эне болуп балага тарбия бергенге даярсыңарбы, төрөлө турган баланын милдетин ала аласыңарбы? Мына ушул суроого жооп берүү абзел. Эгерде бири-бириңерди сүйсөңөр моралдык жана финансылык кыйынчылыктарды жеңесиңер, бактылуу өмүр сүрүүгө умтуласыңар. Сүйүү жок болсо, ал жөнүндө кызга чындыкты айтыш керек, калп айткан болбойт. Аталык милдетке даяр болбосоң кызга ачыгын айтуу милдет. Кааласаң баланы калтыр финансылык, материалдык жактан жардам берип турам, балага каралашам деп. Эгерде толук жетиле элек болсоңор же кыздын жашы келе элек болсо, менин кеңешим ата-энеңерге ачылып алардан акыл, кеңеш сураганыңар пайдалуураак болот. Айтаарым бул көйгөйдү батыраак чечүү маанилүү!