Саламатсызбы. Bilesinbi.kg сайтына рахмат, кызыктуу маалыматтарды окуп, бир топ суроолорубузга жооп алып келебиз. Мен Жалал-Абад облусунун, Ноокен районунан болом. Акыркы күндөрү вотсаптагы группаларга билдирүүлөр, кийин видеолор келе баштады, кичинекей кыздар уурдалып жатат деген. Турмуш шартка байланыштуу Москвада эмгектенем. Айылда ата-энем менен калган бала-чакага сарысанаа болуп жатам. Ушул чынбы, билип бериңизчи?
Жеңиш Ашырбаев
Ош облусунун Ички иштер башкармалыгынын прес-катчысы
Биз бул видео боюнча маалыматты тактадык. Биздин бөлүмгө 2-3-класста окуган 3 кыздын ата-энесинен арыз түшкөн. Кичинекей кыздар аларды ак машине айдаган эркек киши үйүнө жеткирип коем, деп салып кетиптир, бир жерге барып токтогондо кыздар качып келишиптир деген билдирүүлөр келип түшкөн. ИИБнин кызматкерлери иштин чоо-жайын териштиргенде эч кандай ак машине болгон эмес, кичинекей кыздар, оюнга алаксып, кеч калып калышканы, үйдөгү уруштан коркуп, ушинтип айтууну чечишкени белгилүү болду.
