Өзүңдүн темпераментиңди төмөндөгү сыпаттамаларды окуп аныктап алсаң болот. Жалаң эле бир темпераментке тиешелүү адамдар чанда кездешет. Ошондуктан дароо экөөсүн тандап алсаң болот. Биринчиси – негизги, экинчиси – кошумча.
Холерик
Күчтүү, кызыл кандуу, тынымсыз кыймыл аракетте болуп турат. Бул импульсивдүү, жалындап күйүп турган адам. Бир нерсени баштаса баш оту менен кирип, жан дилин берип жасайт. Кыйынчылыктарды айланып өтпөстөн жеңип чыгат. Энергиясы ашып-ташып турат. Сүйлөгөндө үнүн катуу чыгарып, көп жаңсайт. Эмоцияларын башкара албайт, чыдамы жок. Маанайы тез-тез өзгөрүп турат.
Ылайыктуу кесиптер: сатуулар боюнча менеджер, радио же теле алып баруучу, режиссер, дизайнер, гид ж.б. Адамдар менен мамиле курууну талап кылган кесиптер.
Сангвиник
Күчтүү, ачууга алдырбайт, жаны тынбайт. Ар дайым кыймылда болуп турат, көптү билгиси келет, ийкемдүү, ак көңүл. Эч качан башын жерге салып калбайт, көйгөйдү чечүүнүн жолун издеп, алдыга умтулуп турат. Адамдар менен тез тил табышат. Боорукер, маңдайы жарык.
Ылайыктуу кесиптер: журналист, экономист, адвокат, мугалим. Кыскасы, коммуникабелдүүлүктү жана ийкемдүүлүктү талап кылган кесиптер.
Флегматик
Бир мүнөз, инерттүү, туруктуу. Өзүн токтооо алып жүргөн флегматиктерди ызы-чуу салып, кыйкырып жатканын элестетүү мүмкүн эмес. Кандай болбосун конфликттерди жек көрүшөт. Оор басырыктуу жана чыдамкай адамдар. Алардын ички дүйнөсүндө эмне болуп жатканын аңдап билүү өтө оор. Флегматиктер жаңы кырдаалга жана турдүү өзгөрүштөргө дароо көнө койбойт. Бул адамдар шашпай, дыкат жумуштун майын чыгарып иштешет.
Ылайыктуу кесиптер: инженер, дарыгер, лаборант, агроном, системалык администратор ж.б. Флегматиктер үчүн эмоцияны жыйыштырып коюп так анализ жүргүзүп чечим кабыл алууну талап кылган кесиптер ылайыктуу.
Меланхолик
Оома, инерттүү, уяң. Тарынчаак, сезимтал, катуу айтылган сөздү көтөро албайт. Меланхоликтер башка адамдардан оолак болууну жактырышат. Көнүмүш жана тынч кырдаалда гана иштеп мыкты көрсөткүчтөргө жетет. Кишинин ички дүйнөсүн алдына салып берип койгондой окуй алат, баарлашканда абдан этият. Жаңы нерселерди кабыл ала албайт. Тааныш эмес коомдо өзүн ыңгайсыз сезет.
Ылайыктуу кесиптер: жазуучу, сүрөтчү, окумуштуу, программист, психолог, архитектор ж.б. Башкалар көрбөгөндү байкап, деталдарга маани берүүнү талап кылган кесиптер.
Маалымат бул жерден алынды.
