Осул – бул ооздун ичине чыккан жара. Бул дарт менен көбүнчө кичинекей балдар жабыркайт. Бирок оозу оосул болгон чоңдор да аз эмес. Осулдун белгилерин, себебин жана дарылоо жөнүндө ЛОР дарыгер Надира Амантаева Bilesinbi.kg’ге айтып берди.
Осулдун белгилери:
- Өңү ак же саргылт болот;
- Тилиң менен тийгизип көргөндо оюлуп калгандай сезим калтырат;
- Тамак ичкенде ооруганы күйчөйт (ошондуктан тамак ичүү кыйынга турат, эмчектеги балдар сүт эмүүдөн баш тартат);
- Шилекей көп бөлүнүп, жута албайсың (кичинекей балдардын шилекейи тынбай агып калат);
- Өтүшүп кеткен учурда ооздон сасык жыт чыгат.
Эмне себептен осул чыгат?
- Тилин, ээгин же жаактын ички тарабын тиштеп алгандан;
- Иммунитет алсыз же түшүп кеткен учурда (этек кири келип жатканда, кош бойлуу учурунда);
- Стресс болгондо;
- Тукум кууйт;
- Осул болуп ооруган кишиден жугат (анын идиши менен колдонгондо, чоңдор кичинекей балдарга тамак чайнап бергенде, өбүшкөндө);
Кантип дарылоо керек?
Алгач ооруган кишинин идиш аягын бөлүп алуу зарыл. Осулдун бир нече түрлөрү болот, аларды дарылоо ыкмалары бири-биринен айырмаланат: аллергияга каршы дарылоо, симптоматикалык дарылоо, анестетиктер менен даырлоо. Ошондуктан, ЛОРго сөзсүз көрүнүп, анализ тапшыруу зарыл. Анын негизинде доктур дарыларды жазып берет. Жалпы рекомендация катары жылуу сууга соода аралыштырып улам чайкап турууну, чычырканактын майын колдонууну жана метрогил дента гелди сунуштай алам.
