Кимден сурасаң да баардыгы мектептен, сабак окуудан качып көргөнүн айтса керек. Качууда алардын ар кандай себеби болушу мүмкүн, мисалы сабакка даяр эмес, достору менен бир жакка баргысы келген, жок эле дегенде уйкуну шылтоолошкон.
Бирок, мындан сырткары мектептен качуунун негизги себептери дагы бар. Кандай себептер экенин Москва Гештальт институтун бүтургөн психолог Гүлмира Молдокулова айтып берди.
Кызыксыз сабак
Мугалимдин түшүндүрө албай, сабак кызыксыз өткөрүлсө бала бекер олтургусу келбей качып кетет.
Чыр-чатактар
Классташтардын арасындагы талаш-тартыштар, шылдыңдоо, басынтуу же болбосо жаман ат коюп аны маскаралоо. Ушундай эле көрүнүш мугалим менен окуучунун ортосунда дагы кездешет. Окуучуну классташтарынын көзүнчө урушуп, кемсинтип аны басмырласа, тапшырманы жогорку денгээлде айтып берсе дагы төмөн баа койсо, бала өзүн ыңгайсыз сезип сабакка келбей коёт.
Туура эмес мектепти тандоо
Мисалы гуманитардык сабактарга жакын бала, физика, математикага басым жасаган мектепке окуп калса ага кыйынчылыктар жаралып, ал сабактан качат. Мындай учурларда мектебин алмаштыруу туура болот.
Эс алуунун аз болушу
Мектептен үйгө берген тапшырманын же мектептен тышкаркы даярдоочу курстардын көптүгү баланы чарчатат. Бардык тапшырманы аткарганга үлгүрбөй мектепке баруудан баш тартат.
Үй-бүлөдөгү чыр-чатактар
Дайыма үйдө уруштар көп болуп турса, атасы же апасы ичсе бала уялып мектепке баргысы келбейт.
Туура эмес чөйрөгө туш болуп калуу
Бул эң негизги себеп болуп эсептелинет. Тентек, ууру, сабактан качкан, ата-энесин укпаган, ичип, чеккен балдарга кошулуп калса бала аларга аралашып өз киши болуу үчүн мектепке барбоого, окууну экинчи орунга койгонго өтөт.
Баланын окуудан качуунун негизги себептери ушулар болуп эсептелинет. Бул масалени чечүү үчүн балага көп көңүл буруу абзел, кээ бир учурларда психологдун дагы жардамына кайрылуу маанилүү.
