“Тонус” коомдук фондунун жана “Change Fitness» фитнес клубунун генералдык директору, жаш ишкер Урмат Насыкулов Bilesinbi.kg’де конокто болуп, ийгилик сырлары менен бөлүштү.
Ийгиликтин даяр формуласы жок. Өзүнө ишенген, эл камын ойлогон, уникалдуу идеясы бар, көйгөйлөрдү чече алган адам гана ийгиликке жетет.
30 жашка чейин ким болоорун билбөө нормалдуу көрүнүш. Эң башкысы, бир орунда турбай, “Бул жашоого эмне үчүн келдим?” “Миссиям кандай?” деген суроолорду берип, изденүү керек.
Алдыга кадам таштаганда гана мүмкүнчүлүктөр ачыла баштайт. Болгону аракеттенүү керек!
Бизнес баштоо үчүн акча зарыл эмес. Акчасын кайда салууну билбей жүргөн ишкерлер көп, болгону жакшы идея жок. Бул идеянын жаратуучусу – жаштар.
Сөзсүз эле бизнесмен болуунун кереги жок. Кандай гана жумуш болбосун өзүңө жакса, ыракат алып келсе, каалаган кыйынчылыктан аттап өтсө болот.
Ишкер эч качан акчанын аркасынан чуркабайт! Анын эң биринчи кызыкчылыгы — коомго пайда алып келүү.
Кыйынчылыктардан коркпош керек. Алар алдыга умтулууга түрткү берет.
