«Башында жашырчумун, азыр ичиме батпайт»,- деп кебин баштаган Айзада (аты өзгөртүлдү) Bilesinbi.kg’ге өз баянын айтып берди.
Башка кыз-келиндерге барат
Күйөөм экөөбүз баш кошкондон бери ичет. Кол көтөрбөйт, бирок намыстанбайт, иштебейт. Эртең менен кетет, кечинде келет. Үй менен иши жок. 6 жашар балабыз бар, ага карабайт.
5-6 айда бир арагын токтотот. Ичпей калса жумуш таап, иштеп акчасын берип, үйгө азык-түлүк алып, киши өңдөнүп калат.
Ким менен кайда жүргөнүн айтпайт. Анын кайда экенин сурагандарга «билбейм» деп жооп бергенден уялам. Ичип эле тим болбостон, башка кыз-келиндерге барат.
Балам үчүн жашап келем
Үй-бүлөбүздүн максаты жок. Кетип калайын дейм, балам атасын, чоң энесин, чоң атасын жакшы көрөт. Эки жыл күтүп төрөгөн баламды, ушунча чоңойтуп алып, таштап кетсем болбой калат го.
Мындан бир жыл мурун ажырашканбыз. Балам чоң энесинде калган. Ал мага, мен ага куса болуп, айлам кетип кайра келгем. Өзгөрөт экен деп жарашкам, өзгөрбөдү, баягы эле күндөр. Кайын-журтум жакшы, мени колдойт. Күйөөмдүн ичкенин төркүнүм билет. Көңүлүм да муздап калгандай. Кандай кылганда жашоом оңолот?
Асель Баимбетова, психолог psihologiya_kg
Саламатсызбы! Үй-бүлөңөрдө мындай жагдай болуп жатканы өтө өкүнүчтүү. Ичкиликке көз каранды адам менен жашоо абдан кыйын, үй-бүлөнүн бардык жүгүн өзүңүз көтөрүп, күйөөңүздүн милдетин аткарып, ал “запойго” кеткенде, үй-бүлөңүздү жалгыз камсыздап, балаңызды багууга туура келет.
Күйөөңүз аракечтик менен ооруйт, дарылоо керек жана оң жыйынтыкка анын сакайууга болгон күчтүү каалоосу менен гана жетүү мүмкүн. Эгер ушул бойдон кала бере турган болсо, аны менен жашайсызбы же жокпу өзүңүз чечесиз.
Көп учурда күйөөсү ичкен аялдар менталиттеттин, «эл эмне дейт” деген түшүнүктүн айынан чыдап, жакшыга үмүт артып жүрө берет, тилекке каршы аягы алар күткөндөй болбойт. Мындай айымдардын абийирдүү, чыдамдуу, толеранттуу, жоопкерчиликтүү сыяктуу психологиялык өзгөчөлүктөрү өздөрүнө эле терс таасирин тийгизет. Күйөөлөрү бул сапаттарынан пайдаланып үй-бүлөсүнө, жүрүм-турумдарына жоопкерчилик албайт. Бул психологияда “бири-бирине көз каранды байланыш” деп аталат. Өзүңүздүн тил алчаактыгыңыз, жардамыңыз менен анын аракечтигин бекемдейсиз. Мисалы:
- Ал карызга ичимдик алат – сиз төлөйсүз.
- Ал карызга акча алат, уят деп, сиз кайтарасыз.
- Бирөө менен урушуп кетет, милицияга барып айып пул төлөйсүз.
- Ал иштебейт, азык-түлүктү сиз сатып аласыз. Бул учурда ал «ичсем да, жашоого керектүү нерсе бар, жоопкерчилик алуунун кереги жок» деп ойлойт.
Жакындарыңыз менен кеңешиңиз. Жүрөгүңүздү угуп, бир чечимге келиңиз.
