“Айыл Банк” АККнын насыяларды кайтаруу бөлүмүнүн башчысы Азамат Солпуев кардар насыясын төлөй албай калганда банк кандай аракеттерди көрөрүн айтып берди.
Ачык болуңуз
Кардар алган насыясын төлөй албай калганда, банк менен ачык болуп кызматташууга барса, банк колунан келген жардамын көрсөтөт. Ар бир банкта бул сыяктуу маселени чечүүчү бөлүмдөр бар. Алар иштин чоо-жайын иликтеп чыгып, кардарга бир канча сунуштарды айтышат.
Досторуңуздан же туугандарыңыздан акча алып туруңуз
Банк карызын төлөй албай кыйналып жаткан кардардын каржы булактарын тактайт. Эгер туугандарынан акча алып туруу мүмкүнчүлүгү бар болсо, кийин кайтарып берүү шарты менен аны колдонууну сунуштайт.
Кредитти төлөй албай калганда банк дароо күрөөдөгү мүлктү алууга шашылбайт. Бардык маселени сотко жеткирбей, сүйлөшүү тартибинде чечкенге аракет кылат.
Төлөмдөрдүн графигин карап чыгууну сураныңыз
Кардар банк менен ачык болуп, жагдайын толук түшүндүрсө, банк төлөмдөрдүн графигин карап чыгып, белгилүү бир убакытка чейин акы төлөөнү узартып, кредиттик каникул берет.
Күрөөдөгү мүлккө кардар табыңыз
Кардардын күрөөдө турган үйүнөн башка кыймылдуу же кыймылсыз активдери жок болсо, банк айткан сунуштар жакшы жыйынтык алып келбесе, банк кардарга күрөөдөгү мүлкүнө өзү кардар табуусун сунуштайт. Жыйынтыгында, үйдү сатып, арзаныраак башкасын алып, ортодогу айырманы карызга берет.
Насыяда берүүдө банк менен кардар ортосунда келишим түзүлөт. Эгер эки тараптуу аракет жыйынтык бербесе, келишимге ылайык иш сотко жөнөтүлөт. Бирок, бул эң акыркы кадам болуп саналат.
