«Айыл Банк” АККнын кредит тескөө бөлүмүнүн башкы адиси Тойгонбаев Арстанбек Жумабекович түз эфирде конокто болуп, кредит төлөй албай калганда эмне кылуу керектигин айтып, окурмандар суроосуна жооп берди.
Арыздарды WhatsApp аркылуу кабыл алып жатабыз
Учурдагы кырдаалга байланыштуу карыз алган жарандарыбызга колубуздан келишинче жардам көрсөтүп жатабыз. Кредит төлөөдө кандайдыр бир тоскоолдуктарга кабылса, анын себебин тактап, WhatsApp аркылуу арыздарын кабыл алып, видео жана аудио менен сүйлөшүп, төлөө графигин жылдырып беребиз.
Банк дароо күрөөдөгү мүлктү алууга же үстүнө пайыз кошууга шашылбайт.
Ар бир карыз алуучу менен индивидуалдуу иштешебиз. Мисалы, бирөөсү пайызын төлөп турайын дейт, экинчиси негизги сумманы жылдырып беришибизди суранат, айрымдары мөөнөтүн алты айга узартууну каалашат ж.б.
Кредитин төлөөдө кыйынчылыктарга туш болгон карыз алуучулар алгач биз менен байланышат. Биз төлөмдөрүн карап чыгып, кардарга эмне кылуу керек экенин түшүндүрүп беребиз. Анан ал өз атынан арыз жазып, WhatsApp аркылуу жөнөтөт. Келип түшкөн арызды эки-үч күндүн иичинде карап чыгып, төлөө мөөнөтүн талабына жараша коюп беребиз.
Эң негизгиси карыз алуучулар биз менен ачык болуп кызматташууга барса, колубуздан келген жардамыбызды көрсөтөбүз.
