Салам, достор! Кокустан жаныңыздагы жакыныңыз же бейтааныш эле бирөө көкүрөгүн мыкчып, катуу ооруп жатканын айтып калды дейли. Өзүңүздү жоготпостон, тез жардам келгиче, бул биринчи жардамды көрсөтүп турсаңыз, өмүрүн сактап калышыңыз мүмкүн.
Эгерде адамдын көкүрөгү бирөө басып жаткандай болуп, катуу кысылып ооруса, бул белгилер коркуу сезими, кусуу, жүрөк айлануу менне коштолсо, анда бул анын өмүрү үчүн коркунучтуу. Бул инфарктка чейинки абалды, инфарктты, тромбдун үзүлүшүн ж.б. билдириши мүмкүн. Мындай учурларда, жүрөктүн токтоп калуу коркунучу жогору.
1. Оорулууга физикалык жана психикалык эс алууну камсыз кылыңыз (жаткырып же отургузуңуз), ал кыймылдабашы керек.
2. Дем алуусун жеңилдетиңиз: жакасын, топчуларын, галстукту чечип, терезени, ачыңыз.
3. Тез жардам келгенге чейин бейтапты тынчтандырыңыз. Уюган кандын пайда болушуна жол бербөө үчүн бейтапка жарым таблетка аспирин бериңиз (эгерде аспиринге аллергия жана кан агуу жок болсо).
4. Жүрөктүн кан тамырларын кеңейтип, ооруну басаңдатуу үчүн тилдин астына нитроглицерин таблеткасын же изокет спрейин бериңиз.
5. Оору улана берсе, бул дары-дармектер ар бир 5 мүнөт сайын үч жолу берилиши мүмкүн. Бул дарыларды 100 мм аз кан басымда бербеңиз.
6. Зарыл болсо жүрөк-өпкө реанимациясын баштаңыз. Бейтапты өзүңүз же тез жардам аркылуу ооруканага алып барыңыз.
Тез жардам көрсөткөн учурларыңыз болду беле?
