Ололо коворкинг сеттеринин негиздөөчүлөрүнүн бири Данияр Аманалиев жашоосун өзгөртүп жана көңүлүн чындап маанилүү нерсеге бурууга жардам берген эреже тууралуу айтып берди.
«Башка адамдын негативи — сенин көйгөйүң эмес!» Жашоодо бул эреже мага аябай жардам берди. Кеп эмне жөнүндө болуп жатат деп ойлойсуз?
Жыл өткөн сайын мен бир маанилүү нерсени түшүндүм. Көрсө, биз айтып жаткан нерсе, аны менен эмнени айткыбыз келгени, ал нерсени башка адам кантип укту жана кантип түшүндү төрт башка нерсе экен. Тактап айтканда, башка адамга эмнени жеткиргибиз келгени менен, ал адам аны кантип түшүнгөнүнүн ортосунда баары бир айырма болот тура.
Экөөңөрдүн жашоо шартыңар башка болгондуктан, ал баары бир башкача түшүнөт, сиз дагы башкача түшүнөсүз дегендей. Мисалы, сиз ага жөн ага бет аарчы жөнүндө айтсаңыз, ал үчүн бет аарчы жаман бир нерсенин белгиси болушу мүмкүн, анан көңүлү түшүп калат дегендей.
Башка адамдын башында эмнелер болуп жатканы үчүн жооп бербей турганымды билгенден кийин жашоо жеңилдеди. Ошондон кийин менин айтканымды жана жасаганымды башкалар жактырбаса көп кабатыр болбой, кол шилтеп калдым.
Жаш кезимде баарына жаккым келчү. Бирөөлөр үчүн чын жүрөктөн жакшы нерсе жасап жатканымда, башкалар аны талкуулап сөз кылышса, жаман болор элем. Жаш өткөндөн кийин гана, башкалар менин айтканымды кантип ойлойт жана кабылдайт экенин ойлонбой калдым.
Эгер мен баарына жагууга аракет кылсам, биринчи кезекте өзүмө жакпай каларымды билдим.
«Башка адамдын негативи — сенин көйгөйүң эмес!» Бул кеңешимди силер туура учурда окуйсуңар деп ойлойм. Балким силерде дагы ушундай көйгөй бар. Башкалар сиз жасаган нерсени жамандап, сизден көптү күткөнүн, сизден көңүлү калганын айтып жатышканда, ушул сөздү эстеңиз.
Видеону толугу менен бул жерден көрө аласыз.
