Талак деген өтө кооптуу сөз. Оозду карап сүйлөбөсө ортодогу ак никени бузуп коёт. Теолог Улан Усупов кайсы учурда талак түшөөрүн айтып берди.
“Талак” сөзү араб тилинен которгондо “бошотуу” дегенди түшүндүрөт. Шариятта талак берүү укугу — эркекке гана берилген. Үч талак берилгенден кийин жубайлар бирге боло алышпайт. Бир же эки талактан кийин жашай берсе болот.
Талак түшөт:
- Мас абалында айтылса;
- Кызуу кандуулукка алдырып айтса;
- Телефон аркылуу чалып айтса;
- Телефон аркылуу смс жазса;
- Конкреттүү түрдө кимге талак бергенин ачык-айкын түрдө кагаз бетине жазып берсе.
Кээде үч талак түшкөндүгү так болбой калат, андыктан жакшылап тактоо керек. Мисалы, “сага талак берем” десе (мөөнөтү белгисиз) же бир жолу эле айтып койсо түшпөйт. Дароо үч талак же «талак» деп бирден айта берип, анысы үчкө жетип калса жубайлар ажырашууга мажбур.
«Үч талак» деген сөз ооздон чыкты дейли. Кийин жубайлар кайрадан бирге болууну каалашса, алгач аялы башка бирөө менен никеге туруп, кайра ажырашып келүүсү керек.
Талак маселесинде билимдүү молдого, белгилүү аалымга же атайын муфтияттын фатва бөлүмүнө кайрылыңыздар.
Талактын тамашасы болбойт!
