Кекечтенүүдөн толугу менен кантип айыкса болот? Адис жооп берет
Саламатсызбы! Мен 15 жаштамын. 6-7 жашымдан тартып эле кекечтиктен кыйналып келем. Сүйлөп келе жатып эле такалып калам. Өз оюмду так айта албай, өзүмдү жаман сезип келем. Кекечтенүүдөн толугу менен кантип айыкса болот? Канча убакытты талап кылат? Алдын ала рахмат.
Рано Бусакова
Логопед
Саламатчылык. Кекечтенүү бул речтин оорусу, аны менен жашоо абдан оор. Сизди жакшы түшүнүп турам, бирок өзүңүздү таштабаңыз. Мен сизге биринчи кезекте неврологго кайрылууну сунуштайм. Ал сизди көрүп, медикаментоздук дарылоо керек же керек эместигин айтат. Андан тышкары психологго да кайрылышыңыз керек. Психолог өзүңө болгон ишенимди пайда кылып, коркуу, ачуулануу, капа болуу сезимдери менен иштөөгө жардам берет.
Кекечтенүү бул речтин темп-ритмикалык бузулушу. Анда адам тыбыштарды же муундарды улам-улам кайталап, ортодон көп пауза жасайт. Себеби дем алуу жана сүйлөө аппаратындагы тийиштүү булчуңдар карышып (спазм, судороги) калат.
Кекечтенүүгө адамдар адатта катуу чоочуганда, стресске кабылаганда туш болушат. Кекечтенүү тукум кууйт. Логопед анын түрү, формасы жана татаалдыгына жараша иш алып барат.
Ошондуктан мүмкүн болушунча эртерээк адистерге кайрылыңыз.
Ийгилик!