Жыныстык жагым карарып кетти, кантип кетирсе болот? Гинекологдун жообу
Саламатсызбы. Менин суроомду да чыгарып бересизби? 23 жаштамын, боюмда бар, 9 ай болуп калды. Байкашымча акыркы эки-үч айдан бери “женский” жагым карарып кетти. Эмне үчүн мындай болуп калды? Кантип кетирсе болот?
Раушан Джумагулова
“Эркай” клиникасынын адиси, акушер-гинеколог
Саламатчылык. Бул нерсеге такыр кабатыр болбой эле коюңуз. Аял кош бойлуу болуп турган кезинде, организминде пигментациянын күчөшү байкалат. Бетине сепкил түшөт, курсагынын так ортосунан кара сызык пайда болот, эмчегинин үрпү карарат, колтуктары жана жыныс кыны тарабындагы териси адаттагыдан карараак болот. Бирок, бул убактылуу гана көрүнүш. Көз жарып алгандан кийин, тамактанууңуз жакшы, организмде бардык витамин жана элементтер жетиштүү болсо, өзүнөн өзү эле жок болуп кетет.
Мындай көрүнүш гормондордун ашыкча бөлүнүшүнө байланыштуу. Маселен прогестерондун таасири алдында меланин жана башка гормондор өтө көп иштелип чыгат.
Меланин – бул кара жана күрөң түстөгү пигмент. Ал адамдын терисинде, чачында жана көзүнүн карегинде камтылат. Демек адамдын терисинин, чачынын жана көзүнүн өңүн калыптандырат. Организмде меланин пигменти азая баштаганда чач агарат. Мисалы альбиностордо бул пигмент тубаса жок болот.