ФАПтагы эже балаң өлүк төрөлөт деп коркута берет. Гинеколог жооп берет
Саламатсыңарбы. Мен төртүнчү балам менен кош бойлуумун, 18 жума болуп калдык буюрса.
Биринчи баламда кокусунан давлением көтөрүлүп, врачтар “белок” бар, балаң өлүк төрөлөт дешкен. Бирок, сопсонун эле эркек бала төрөп алдым.
Экинчим менен да кош бойлуу болуп жүргөнүмдө ФАПтагы эже анализдерди көрүп, “белок” көп экен, деп коркуткан.
Негизи “белок” канча болуш керек анализде? Жооп берип койгулачы, өтүнүч?
Раушан Джумагулова
“Эркай” клиникасынын адиси, акушер-гинеколог
Саламатчылык. Зааранын курамында белок такыр болбоого тийиш. Айрым учурларда, кош бойлуулардын анализдеринде “белоктун” калдыктары байкалат. Бирок, бул негизинен анализ туура эмес, чогултулган учурда болот.
Ошондуктан анализ тапшыруу үчүн заара чогултуп жатканда, алдын ала жуунуп алып, таза идишке чогултуу шарт.
Бөйрөк ооруларынын жок экенин аныктап алуу үчүн дагы бир ирет заара анализин тапшырып, бөйрөктөрдү УЗИге тарттырып, бөйрөк тестин тапшырып коюу ашыктык болбойт.
Анализдердин жыйынтыгына жараша дарылануу жазылат.
Эсиңизде болсун! Эне-баланын ден соолугуна жана өмүрүнө терс таасирин тийгизе турган олуттуу оорулар белоктун көбөйүп кетүүсүнөн башталат. Ден соолугуңузга сак болуңуз.
Аман-эсен көз жарып алыңыз!
Башкы беттеги сүрөт интернеттен алынды.