Кантип алименттин суммасын көбөйттүрөм?
Кызыма алимент кестиргем. Сот тапкан кирешесинин төрттөн бир бөлүгүн берет деп чечим чыгарган. Жети жыл 2500 сомдон төлөп келген. Эки жылдан бери 1000 сомдон гана төлөп жатат. Себеби пенсияга чыгыптыр. Пенсиясы болжол менен 5, 6 мин сом экен.
Кантип алиментти көбөйттүрсөм болот? Ошентип пенсиясынан эле төлөп койсо болобу?
Нурислам Раимжанов
"Справедливость" укук коргоо уюмунун юристи
Саламатсызбы!
Алиментти тапкан же башка кирешесинин эсебинен төлөсө болот. Пенсияны сот аткаруучулар кошумча киреше катары эсептейт.
Сиз сот аткаруучуга балаңыздын атасынын пенсиядан башка дагы кирешелерин тактап берүүнү өтүнүп кайрылыңыз. Арызыңыздын негизинде сот аткаруучу киреше булактарын текшерүү иш-чараларын жургүзүү же жүргүзүүдөн баш тартуу боюнча жооп берүүсү керек. Эгер ал ишти териштирүүдөн баш тартса, жогорку баскычтагы сот аткаруучуга кайрылсаңыз болот.
Андан сырткары, эмне себептен 1000 сом алимент төлөп калганын, кайсы берененин негизинде иш алып барып жатканын сураңыз. Сот аткаруучу сизге жазуу түрүндө жооп берет.
Ушул суроолорго жооп алгандан кийин гана сиздин маселени чечүү жолдорун карасаңыз болот.