Канча жаштан баштап пирсинг жасатса болот?
Жаштар пирсинг жасатып жатып анын кесепеттери тууралуу ойлонбойт. Пирсинг - бул каршы көрсөтмөсү бар кичи-операция экенин көбү аңдабайт көрүнөт. Дал ушул себептен улам пирсинг жөнүндө дарыгердин пикирин угуп көрүүнү чечтик.
Мен 16 жаштамын. Мурдума пирсинг тактырайын десем, апам каршы болууда. Пирсингдин зыяны жокпу?
Урматтуу окурман, пирсингди төмөнкү учурларда тагууга тыюу салынган:
- 18 жашка чейинкилерге
- өнөкөт оорулар менен ооруса
- температурасы жогоруларга
- кан айлануусу начарларга
- лидокаиндик препараттарга жана металлга аллергиясы барларга
- канда алкогол жана баңги болсо.
Азыр 16 жашта экенсиз, 18ке чыгып, пирсинг тактырып калсаңыз буларды эске алыңыз:
- Пирсингди кармаардан жана ага дары-дармек сүйкөөрдөн мурун колуңузду тазалап жууңуз.
- Жаңы тагылган пирсингге тийбеңиз.
- Спорт зал, баня, душ жана бассейн менен жылуу ваннаны колдонбой туруңуз.
- Кулагыңызга же бетиңизге пирсинг тактырсаңыз, айыкканча чачыңызды чогултуп жүрүңүз.
- Пирсинг тактырган жер тезирээк айыгып кетиши үчүн йод, спирт, антибиотикалык маздарды колдонбоңуз. Алар жараны ырбатып жибериши мүмкүн.
- Пирсинг тактырган жериңиз толугу менен калыбына келгиче синтетикалык эмес, пахта кийимдерди кийиңиз.
Апаңыз менен кеңешип, бир чечимге келиңиз.