Жолдошум жыныстык катнашка барууга мажбурлайт. Эмне кылам?
Жолдошум жыныстык катнашка барууга мажбурлайт. Эки тараптын тең макулдугу керек экенин кантип түшүндүрөм? Эгер түшүнбөсө эмне кылыш керек?
Гүлбарчын Жумабаева
Эрте курактагы никелер жана зордук-зомбулук боюнча эксперт
Урматтуу окурман, Кыргыз Республикасынын Конституциясынын 16-беренесинде Жыныстык айырмачылыгы боюнча эч ким басмырлоого кабылбашы керек деп жазылган. Сиз төрөлгөндөн баштап, эркектер менен катар бирдей укукка, эркиндикке жана кадыр баркка ээ болуп саналасыз. Мейли, ал күйөөңүз болсун, же жигитиңиз болсун, жыныстык мамилеге мажбурлоо мыйзамда зордуктоо болуп саналат.
Сиздин дене боюңуз бир гана сизге тиешелүү. Эч ким күч колдонуп, эркиңизге каршы, жыныстык катнашка барууга мажбурлоого акысы жок. Бул иш кылмыш-жаза кодексинин 129-беренеси боюнча "Зордуктоо" болуп саналат. Демек, күч колдоно баштаганда милицияга арыз жазам деп ачык айтыңыз.
Ар бир аял эң биринчи өзүн сыйлаганды билиши керек. Ошондон кийин гана аны айланасындагылар сыйлап баштайт.
Суроону ачык бергениңиз үчүн чоң рахмат!