"Турмушка чык" деген сөздөн тажадым
25 жаштамын. Үйдө жалгыз кызмын. Ата - энем менен турам. Апамдын "турмушка чык" деген сөздөрүнөн тажап кеттим. “Ылайыктуу жигит болсо чыгам. Маңдайга жазганын көрөм да” десем, түшүнгөн адам болуп туруп эле кайрадан баштайт. Менин акыбалымды ойлоп койбойт. Атам болсо кадыр-барктуу жерде иштешимди каалайт. Ар дайым алардын айтканын кылам. Жадакалса кийимди да өздөрү алып беришет. Эмне кылышты билбей калдым. Бир жакка кетким келип жүрөт.
Бермет Уланова
Гештальт-консультант
Урматтуу айым, ата-энеңиз жаман оюу менен мындай мамиле кылбаса керек. Балким, сизге болгон сүйүүсүн ушундай жол менен билдирүүгө көнүп калышкан. Өз алдынча чечим чыгара алаарыңызды түшүндүрүңүз. Бул процесс оңой болбойт жана бат өтпөйт.
Ортодогу мамилеңер көнүмүш адат болуп калгандыктан, өзүнчө бөлүнүп кетүү каалооңузду туура кабыл алышабы же жокпу күмөн. Оюңузду ачык айтканда уруш-талаш, таарыныч болот. Даяр туруңуз, ачууга алдырбаңыз.
“Кийимди да тандап беришет” деп жатасыз, алгачкы кадам катары өзүңүзгө жаккан көйнөктү сатып алыңыз. Ата-энеңиз, туугандарыңыз же тааныштарыңыз кандайдыр бир сунуш айтса ойлонуңуз. Жыйынтыгында өзүңүз чечим чыгарыңыз.
Апаңыз бакытын таап кетсе экен деп, турмушка чыгуу темасын козгоп жатса керек. Турмуш куруу жоопту кадам, шашып же бирөөнүн каалоосу менен бул жолго баруу туура эмес. Бактылуу болуу үчүн болочок жарды жакындан таанып билүү кажет. Алгач ата-энеңиз менен маселени чечип алыңыз. Болбосо, үй-бүлөдөгү түшүнбөстүктөр жолдошуңуз менен болгон мамилеге дагы таасирин тийгизет. Ийгилик каалайм!