Кыз ала качуу — кылмыш! 5 жылдан 7 жылга чейинки мөөнөткө эркиндигинен ажыратылат.
Юрист Нурислам Раимжанов кыздарга ала качып кетсе эмне кылуу керектигин айтып берди.
- Ала качууга кабылсаң, мүмкүн болушунча адамдардын көңүлүн бур. Мисалы, бакырып, сени уурдап бараткандарын айтып, элден жардам сура.
- Эч ким жардамга келбесе, ала качкан адамдардын жүзүн, автоунаанын маркасын, түсүн, номерин жаттап калууга аракет кыл.
- Ала качуу учурунда кол телефонуңду көрсөтпө. Алар сага чалууга мүмкүнчүлүк беришпейт жана алып коюшат. Телефондун кереги, кийинчерээк, сени жалгыз калтырганда тиет.
- Ала качкандарга алың жетпесе, күчүңдү сактап калуу үчүн көп каршылык көрсөтпө. Бул кылмыш экендигин жана алар сөзсүз жоопкерчиликке тартылаарын айт.
- Үйүнө алып барышканда, үй ээлерине мындай жол менен турмушка чыгууга каршы экениңди жана кылмыш кылып жаткандарын эскерт.
- Алып барган үйдүн дарегин билүүгө аракет кыл, мүмкүнчүлүк болору менен жакындарыңа жана милицияга (102) байланышка чыгып — кайсы жерден, саат канчаларда, кайсыл жакка, канча адам, кандай автоунаа менен алып качышкандыгын айтып бер.
- Жакындарың келгенче нике кыйдырууга аракет кылышса, турмушка чыгууга каршы экениңди билдир. Аялдын ыраазычылыгын алмайын, молдонун нике кыюга укугу жок.
- Ала качкан жерден чыгарың менен милиция бөлүмүнө болгон окуя боюнча арыз жаз. Арызыңа 14 күндүн ичинде жооп берүүлөрү керек.
- Тергөөчүнүн телефон номерин жазып ал. 14 күндүн ичинде арызыңа жооп бербесе, чалып сура.
- Ден-соолугуңа зыян келтирилген болсо, тергөөчүдөн сага соттук-медициналык экспертиза дайындоо боюнча токтом чыгарып берүүсүн сура. Токтомду алып экспертизадан өт (экспертизанын корутундусун тергөөчү өзү алат, сен болгону ал жакка барып өтүп коёсуң).
14 күндүн ичинде арызга жооп бербөө — мыйзам бузуу болуп эсептелет, бул боюнча прокуратурага кайрыл.
Өз укугуңду бил! Корго! Колдон!
