“Билесиңби” долбоорунун бул жолку коногу режиссёр, сценарист жана продюсер Айбек Дайырбеков жаштардын суроолоруна жооп берди.
Тасмалардагы киноляптарга кандай карайсыз?
Тасма айдыңында киноляптарды көзөмөлдөгөн атайын адис болот. Калем, дептер, фотоаппартты көтөрүп алып, ар бир кадрды сүрөткө тартып, кемчиликтерин карап турат. Киноляп таап алсаңыз сүйүнүп коюңуз. Ал чоң көйгөй эмес.
Режиссёр кандай сапатка ээ болушу керек?
Режиссёр өжөр болушу керек. Кино оңой-олтоң жумуш эмес. Кыйынчылыктар көп болот. Талантуу бирок көк бет болбосоң жумушуң аягына чыкпай калат.
Сизге кандай жанрдагы кино тарткан жагат?
Жомокторду жакшы көргөнүмө карабастан, көбүнчө драма тартам. Баары келип каражатка такалат. Келечекте сөзсүз кыялымды ишке ашырам.
Актёрлордун эмнесине көңүл бурасыз?
Биринчиден кесипкөйлүгүнө карайм. Кечиккендерди жактырбайм, тактыкты баалайм.
Камерадан сүрдөйм. Мага кандай кеңеш бересиз?
Камерадан сиз гана эмес, ар бир адам уялат. Анын өзүнчө сүрү болот. Бир нерседен корксоң, бекинип жүрө бербей, кайра-кайра жасаш керек. Ошондо гана тажрыйбалуу болосуң.
Алдыга чоң максат коюп ага жетүүгө аракет кылгыла. Эч кимди укпагыла! Кааласаңар тоону томкоросуңар!
