Эмчектеги сүттү кантип азайтса болот? Маммлолог жооп берет
Саламатсызбы. Эмчектин сүтүн кантип азайтса болот? Кызым 8 ай болуп калды. Сүтүм дагы деле көп.
Аида Осомбаева
“Medcenter.kg” медициналык клиникасынын адиси, маммолог
Саламатчылык. Эгер сүттү азайткыңыз келсе, баланы эмизип бүткөнндөн кийин эмчекти саабаңыз, толугу менен бошотпоңуз. Сиз канчалык сааган сайын, организм сүт жетишсиз болуп жатат деп, ошончолук көп сүт иштеп чыгат.
Ал эми баланы биротоло эмчектен чыгарып салгыңыз келсе, болгону эмизүүнү акырындык менен азайтыңыз. Мисалы учурда күнүнө 8-9 жолу эмизсеңиз, 6-7 жолу эмизгенге чейин азайтыңыз. Ал ортодо балага башка тамак берип, курсагын тойгузуңуз. Мисалы йогурт, пюре, каша берсеңиз болот.
Акырындык менен күнүнө 1-2 жолу эле эмизип, кийин такыр токтотуп койсоңуз болот. Ушинтип эмчектен чыгаруу абдан ыыңгайлуу. Бала дагы стресс болбойт, сиздин организмге да жакшы. Сүт акырындык менен тартылып, азая берет. Эмчегиңиз катып, дене табыңыз көтөрүлүп, дары ичип кыйналбайсыз.
Бирок, баланы колдон келишинче 1-2 жашка чыкканга чейин эмизген туура. Бул анын иммунитетинин жакшы болушуна мыкты шарт түзөт.